ஒரே மருந்து
புதியவன்
கொக்கரிக்க மறந்து
கறி சட்டியில் கொதிக்கிறாள் தாய்
செல்லப்பிள்ளைகளோ
ஓடு உடைத்து உலகை காணும் கனவுகளுடன்
ஆம்லேட்டுகளாக
மடிந்து போயின
மக்களின் தலைமுறைகள் போல சத்தம் இல்லாமல் கதை முடிகின்றன
உணவு விலை அடுக்குமாடி ஏறிட
வயிற்று பள்ளத்தாக்கு
ஒருவேளை உணவை மறுக்கிறதா
துளி பாலில்
லிட்டர் வெந்நீர்
தேநீராக கொதிக்கிறதா
பெட்ரோல் விலை
வானம் தொட்டிட
பயணங்கள்
இறகிழந்த ஈசலானதா
கருகும் வாழ்வை
கண்ணெட்டாதபடி மறைக்க
கண்கூசும் வெளிச்சம் பளீரிடுகின்றதா
எவன் வீட்டு மல்லிகை
எவனுக்கோ மணப்பதுபோல
சேமித்த பணம் எவனெவனுக்கோ
டிஜிட்டல் எண்களாக பறிபோகிறதா
மக்கள் ஈக்களாக மொய்த்திருந்தும்
மனம்
கருங்காட்டின் அகதியாக கலங்குகிறதா
எவராகினும் லொள்ளென்று வெடிக்கின்றதா
கற்க பணம்
சுவாசிக்க பணம்
தாகம் தணிய பணம்
நோய் நீங்க பணம்
மகிழ்ச்சி நிம்மதி பணம்
இல்லையென்றால் நீ பிணம்
பொட்டில் அடித்தாற்போல்
உலகம் சொல்கிறதா
வலியின்றி சாக மருந்திருந்தால்
வயிறாற அருந்த
மனம் ஏங்குகிறதா
தலைமுறைகளை வீழ்த்தும் பெருந்தொற்றின் அறிகுறிகள்
பூணூல் இழுத்து
முதுகு சொறியும் முதலாளிய கிருமிகள்
குருதி சுவாசம் சிந்தனை
முற்றிலும் பரவிவிட்டன
ஒரே மருந்து
மக்கள் அதிகாரம் பழகு
